Тред №706338

Цитата
Некоторыи же от них посадничи дети Исаака Борецкого с матерью своею Марфою и с прочими инеми изменникы ... начаша нелепая, и развращенная глаголати и на вече приходящи кричати: «не хотим за великого князя Московъского, ни зватися отчиною его. Волныи есмы люди Великы Новъгород, а Московскои князь велики многы обиды и неправду над нами чинит, но хотим за короля Польскаго и великого князя Литовского Казимера». И так възмятеся весь град их и въсколебашася яко пияны, овии же хотяху за великого князя по старине к Москве, а друзии за короля к Литве.

Темъ же изменьници начаша наимовати худых мужиков вечников, на то за все готови суть по их обычаю. И приходящее на вече их звоняху за все колоколы и кричаще глаголаху: «за короля хотим». Инии же глаголаху имъ: «за великого князя Московского хотим по старине, как было преже сего». И те наимиты тех изменников кааменье на тех метаху, которые за великого князя хотят и велико неустроение бяше в них и межь себя ратяхуся, сами на ся въстающе. Мнозии же от нихъ старыи посадници и тысяцкые лучшие люди, тако же и житьи люди, глаголаху к ним: «не лзе, брате, тому так быти, яко же вы глаголете, за короля нам датися, и архиепископа поставити от него Латина суща, а из начала отчина есмы тех великих князеи».

Исаковы дети и с прочими съ их поборникы и с наимиты своими, яко взбесишася или яко звери дивии безчеловеченъ разумъ имущее, князя великого послов речей, тако же и митрополита Филиппа посла, ни слышети не хотяху, но и еще наимоваху злых тех смердов, убииц, шилников и прочих безъименитых мужиковъ, иже скотом подобни суть, ничто же разума имущих, но точию едино кричание, иже и безсловеснаа животнаа не сице рычаху, их же онии Новгородстии людие невегласи государемъ зовут себе Великый Новгородъ. И ти приходящее на вече бьяху в колоколы и кричаху и лааху, яко пси, нелепая глаголаху: «за короля хотим».